ياصياد الطيور ياخال
صباعك
عن زناد الموت
دنا عصفور
ضعيف الحال
ولا اكفيش عيالك قوت
................
انا العصفور وليف الخضرة والمية
بأقول الحان يغنيها الجنينية
بأقول تغاريد وأقول أناشيد
نغمها جديد على السامعين
بمعنى قريب
ومعنى بعيد
وتورية
طوينا الجو بجناحه
وانا طاير
اتوه في الدنيا واتغرب
واعد حاير
لنا محزون ولا فرحان
ولا باشبع غنا والحان
ولا باشكي من القسمة
ولابحكي مع النسمة
ولما الدنيا تبكيلي
بأقول ومسيرها مبتسمة
واديلي كتير على داالحال
أقاسي الحلو
والبطال
ياصياد الطيور ياخال
......................
بأشوف الصقر فارد في الفضا باعه
واتباعه
نشرهم في الشجر...جاعو
طيور تانيين
صغار مساكين
جوعى لكين
لا هم نايمين
ولا صاحيين..لاطماعه
ع شان نابه
ومخلابه
ومنقاره
بشوف الكل احبابه
وسماره
ودنيا تخاف من القوة
وجو الدنيا
مش هو
واشوف بلبل غريب في الدوح!
بيرقص
رقصة المدبوح
بهفة ريح سقط عشه
حيشكي لمين
وفين ح يروح
واديله سنين على دا الحال
يقاسي الحلو....والبطال
ياصياد الطيور ياخال
........................
ياصياد الطيور حافظ على الخرطوش
دا مية عصفور كمان قدي
مايستاهلوش
حداك الصقر
لو تضرب على وكروه
تلاقي اللحم متكوم
ولابياكلوش
طاوعني رميها من ايدك
طاوعني ارجع
هزيل اللحم لايفيدك
ولاينفع
ياصياد الطيور فكر
وشوف لك صيد
يكون اكبر
وشوفلك صيد يكون اكبر
...............................................
كتبها عام 1962....
رسالة أحدث رسالة أقدم الصفحة الرئيسية
0 comments:
إرسال تعليق